ဂျပန်အစိုးရရဲ့ ယမ်း ၁၀၀၀၀၀ ငွေကြေးထောက်ပံ့မှု ဘယ်လို လျှောက်မလဲ – UPDATE

April 21, 2020 at 7:14 PM

ကိုရိုနာဗိုင်းရပ်စ် ကူးစက်ပြန့်ပွားမှုကို ကိုင်တွယ်ဖို့ စီးပွားရေးဆိုင်ရာ ဆောင်ရွက်မှု တစ်စိတ်တစ်ဒေသအဖြစ်နဲ့ ဂျပန်အစိုးရဟာ နိုင်ငံအတွင်း နေထိုင်သူ အားလုံးအတွက် ယန်းငွေ တစ်သိန်းစီ ထောက်ပံ့ပေးမယ့် သူ့ရဲ့အစီအစဉ် အသေးစိတ်နဲ့ပတ်သက်ပြီး အချက်အလက် အကျဉ်းချုပ်ကို ထုတ်ပြန်လိုက်ပါတယ်။

ဘယ်နိုင်ငံသားပဲဖြစ်ဖြစ် ဂျပန်နိုင်ငံရဲ့ နေထိုင်သူ အခြေခံ မှတ်ပုံတင် စာရင်းမှာ ပါဝင်သူတိုင်းကို အဲဒီလို ငွေကြေးထောက်ပံ့ပေးမှာ ဖြစ်ပါတယ်။
တနင်္လာနေ့က သတင်းစာရှင်းလင်းပွဲတစ်ခုမှာ ပြည်ထဲရေးဝန်ကြီး တာကာ့အိချိ စာနာ့အဲ (Takaichi Sanae) က ဒီအစီအစဉ် အကျဉ်းချုပ်ကို ပြောကြားခဲ့ပါတယ်။
ဧပြီလ ၂၇ရက် အချိန်မှာ ဂျပန်နိုင်ငံရဲ့ နေထိုင်သူ အခြေခံ မှတ်ပုံတင်စာရင်းထဲ ပါဝင်နေသူတိုင်း အရည်အချင်း ပြည့်မီပါတယ်။ ဒါဟာ နေထိုင်သူအဖြစ် မှတ်ပုံတင်ထားပြီး ဗီဇာ ၃လ အထက်ရှိတဲ့ နိုင်ငံခြားသားတွေ အပါအဝင် ဂျပန်မှာ နေထိုင်သူတွေ ဒီအစီအစဉ်နဲ့ အကျုံးဝင်တယ်ဆိုတဲ့ အဓိပ္ပာယ်ဖြစ်ပါတယ်။
မြို့ရွာ အုပ်ချုပ်ရေးရုံးတွေက အိမ်ထောင်ဦးစီးဆီကို လျှောက်လွှာတွေ ပို့ပေးမှာဖြစ်ပါတယ်။ လျှောက်ထားသူတွေဟာ သူတို့ရဲ့ ကိုယ်ရေး သက်သေခံ အထောက်အထားနဲ့ ဘဏ်စာရင်းဆိုင်ရာ အချက်အလက်တွေရဲ့ မိတ္တူတွေကို ပူးတွဲပြီး ဘဏ်စာရင်း နံပါတ်တစ်ခုကို တင်ပြဖို့ လိုပါတယ်။ အိမ်ထောင်စုအတွက် ပေးအပ်မယ့် ငွေစုစုပေါင်းကို နောက်ပိုင်းမှာ အဲဒီ ဘဏ်စာရင်းထဲ လွှဲထည့်ပေးမှာ ဖြစ်ပါတယ်။
အင်တာနက်ကနေ လျှောက်ထားဖို့ “My Number Card” လို့ သိကြတဲ့ တစ်ဦးချင်း သက်သေခံ စနစ်ကိုလည်း အသုံးပြုနိုင်ပါတယ်။
လျှောက်လွှာလက်ခံမှုတွေ စတင်ဖို့နဲ့ ထောက်ပံ့ငွေ ပေးမယ့်အချိန်တွေကို မြို့ရွာအုပ်ချုပ်ရေးအဖွဲ့အသီးသီးက ဆုံးဖြတ်နိုင်ပါတယ်။ အစောဆုံး နောက်လမှာ တချို့ အုပ်ချုပ်ရေးအဖွဲ့တွေက စတင် လုပ်ဆောင်ကြ ဖွယ်ရှိတယ်လို့ ပြည်ထဲရေးဝန်ကြီးဌာနက ဆိုပါတယ်။
SOURCE – NHK