အမေရိကန်−တရုတ် ထိပ်တိုက်တွေ့မှုကို ဂျပန် သတိထားစောင့်ကြည့်နေ

July 29, 2020 at 6:01 PM

၂ နိုင်ငံအကြား ကောင်စစ်ဝန်ရုံးတွေ အပြန်အလှန် ပိတ်ပစ်ပြီး တင်းမာမှုတွေ ပိုမိုမြင့်တက်လာနေတဲ့ အမေရိကန်နဲ့ တရုတ်နိုင်ငံအကြားက ထိပ်တိုက်တွေ့မှုတွေကို ဂျပန်အစိုးရက မျက်ခြည်မပြတ် စောင့်ကြည့်နေပါတယ်။

ဂျပန်အစိုးရအဖွဲ့ အတွင်းဝန်ချုပ် စူဂါ ယော်ရှိဟီဒဲ (Suga Yoshihide) က အမေရိကန်နဲ့ တရုတ်အကြား ဆက်ဆံရေး တည်ငြိမ်ဖို့ အရေးကြီးတယ်လို့ တနင်္လာနေ့မှာ သတင်းထောက်တွေကို အလေးထား ပြောကြားခဲ့ပါတယ်။
ကိုရိုနာဗိုင်းရပ်စ် ကူးစက် ပြန့်ပွားမှုတွေ ဖြစ်နေတဲ့ အတောအတွင်း နိုင်ငံတကာပူးပေါင်းဆောင်ရွက်မှုတွေဟာ ပိုမို အရေးပါလာတယ်လို့ သူက ဆိုပါတယ်။
အမေရိကန်ပြည်ထောင်စု တက္ကဆက်ပြည်နယ်၊ ဟူစတန်မှာ ရှိတဲ့ တရုတ်ကောင်စစ်ဝန်ရုံးကို ပိတ်ပစ်ဖို့ အမေရိကန်က တရုတ်ကို အမိန့်ပေးခဲ့ပြီးနောက် အခုလို မှတ်ချက်တွေ ထွက်ပေါ်လာတာ ဖြစ်ပါတယ်။ လက်တုံ့ပြန်တဲ့အနေနဲ့ တရုတ်ကလည်း စီချွမ် ပြည်နယ် ချန်ဒူးမြို့မှာ ရှိတဲ့ အမေရိကန် ကောင်စစ်ဝန်ရုံးကို ပိတ်ပစ်ဖို့ အမိန့်ပေးခဲ့ပါတယ်။
ဂျပန်အစိုးရ အရာရှိတချို့က အဲဒီလို ကောင်စစ်ဝန်ရုံးတွေ ပိတ်တာဟာ အမေရိကန်နဲ့ တရုတ်တို့ အကြားက ပြဿနာတစ်ခုသာ ဖြစ်တယ်ဆိုပေမဲ့ သံတမန်ရေးရှုထောင့်က ကြည့်မယ်ဆိုရင်တော့ ဒါဟာ အရေးပါတယ်လို့ ဆိုပါတယ်။ သူတို့တွေရဲ့ ထိပ်တိုက်တွေ့မှုဟာ နောက်အဆင့်တစ်ခုကို ရောက်နေပြီဆိုတာ သံသယဖြစ်စရာ မလိုတော့ဘူးလို့ သူတို့က ဆိုပါတယ်။

SOURCE – Japan Times

Tags: