သမိုင်းဝင် Harajuku ဘူတာရုံအဆောက်အဦးအား ဖြိုချဖျက်ဆီးတော့မည်ဖြစ်

April 3, 2020 at 10:56 AM

သမိုင်းဝင်အဆောက်အဦးတစ်ခုဖြစ်တဲ့ Harajuku ဘူတာရုံအဆောက်အဦးအား 2020 Summer Olympics ပြီးပါက ဖြိုချဖျက်ဆီးတော့မည်ဖြစ်ကြောင်း JR east group မှ((၂၀၁၉)ခုနှစ် နိုဝင်ဘာလ (၁၉)ရက် စနေနေ့တွင် ကြေငြာခဲ့ပါတယ်။ ထိုဘူတာရုံအဆောက်အဦးဟာဆိုရင်တိုကျိုမြို့ရဲ့ သက်တမ်းအရှည်ကြာဆုံး ကျန်ရှိနေတဲ့ ဘူတာရုံဖြစ်ပြီးသစ်သားများဖြင့် ဆောက်လုပ်ထားတဲ့ အဆောက်အဦးတစ်ခုပဲ ဖြစ်ပါတယ်။ ထို့အပြင်
ဥရောပဆန်တဲ့ဒီဇိုင်းပုံစံကြောင့် ထင်ရှားကျော်ကြားပြီး (၉၅)နှစ်တိုင် ဧည့်သည်များကို ဆွဲဆောင်နိုင်ခဲ့တဲ့ ဘူတာရုံတစ်ခုဆိုရင်လည်း မမှားပါဘူး။

Source : JapanpropertyCentral

ယခုတွင်တော့ JR east group ဟာ ဘူတာဟောင်းရဲ့ ဘေးနားကပ်လျက်မှာ ဆောက်လုပ်ထားတဲ့ ဘူတာရုံအဆောက်အဦးသစ်ကြီးကိုတော့ ပြုပြင်မှုများ ပြုလုပ်နေဆဲဖြစ်ပြီး (၂၀၂၀)ခုနှစ် မတ်လတွင် ဖွင့်လှစ်နိုင်ရန် မျှော်မှန်းထားကြပါတယ်။
ဘူတာရုံအသစ်ဟာဆိုရင် ယခုမူလဘူတာရုံအဟောင်းဒီဇိုင်းကို အခြေခံပြီး ဆန်းသစ်တဲ့ ဒီဇိုင်းများနဲ့ မီးဘေးဒဏ်ခံနိုင်အောင် ဆောက်လုပ်သွားမှာ ဖြစ်ပြီး သစ်သားဘူတာရုံဟောင်းအနီးတစ်ဝိုက်ရှိ မီးဘေးအန္တရာယ်အတွက် စိတ်မချရသော၊ မသင့်လျော်သောနေရာများအား မီးလောင်မှုဒဏ်ကာကွယ်နိုင်သောနေရာများဖြစ်စေရန် ဆောက်လုပ်ဖန်တီးသွားမှာဖြစ်ပါတယ်။

Harajuku ဘူတာရုံကို (၁၉၀၆)ခုနှစ်မှာ စတင်ဖွင့်လှစ်ခဲ့ပြီး (၁၉၂၀)ခုနှစ် Meiji ဘုရားကျောင်း မဖွင့်လှစ်ခင်အချိန်အထိ ထိုဘူတာရုံကို အသုံးပြုခဲ့တဲ့ခရီးသည်ဟာ အနည်းငယ်သာရှိခဲ့ပါတယ်။ သို့သော် လည်း (၂၀၁၈)ခုနှစ်တွင်တော့ နေ့စဉ် ထိုဘူတာရုံကို အသုံးပြုနေတဲ့ ခရီးသည်ဟာ ပျမ်းမျှအားဖြင့် (၇၅,၀၀၀)ဦးထိရှိလာခဲ့ပြီဖြစ်ပါတယ်။