ဂျပန် စက်ပစ္စည်းအတွက် အမှာစာတွေ ဧပြီလမှာ ၁၂ရာခိုင်နှုန်း ကျဆင်း

June 10, 2020 at 7:01 PM

ဂျပန်ထုတ် အဓိကကျတဲ့ စက်ပစ္စည်းတွေကို ဝယ်ယူတဲ့ အမှာစာတွေဟာ လအလိုက်ချိန်ညှိထားတဲ့ အခြေခံစာရင်းအရ ဧပြီလမှာ မတ်လကထက် ၁၂% ကျဆင်းခဲ့ပါတယ်။

ပုဂ္ဂလိကကုမ္ပဏီတွေဆီက စက်ပစ္စည်းအဝယ်အမှာစာတွေဟာ စုစုပေါင်း အမေရိကန်ဒေါ်လာ ၆.၉ ဘီလီယံလောက်ရှိပြီး ဒါဟာ နှစ်လဆက်တိုက် အဝယ်ကျဆင်းခဲ့တာဖြစ်တယ်လို့ အစိုးရအဖွဲ့ရုံးက ဗုဒ္ဓဟူးနေ့မှာ ထုတ်ပြန်ခဲ့ပါတယ်။
ကုန်ထုတ်လုပ်ရေးမဟုတ်တဲ့ စီးပွားရေးလုပ်ငန်းတွေဆီက အမှာစာတွေဟာ မတ်လကထက် ၂၀.၂ ရာခိုင်နှုန်းကျဆင်းခဲ့ပါတယ်။ ဒါဟာ အလားတူ အချက်အလက်တွေ စတင်ကောက်ယူခဲ့တဲ့ ၂၀၀၅ ခုနှစ် ဧပြီလနောက်ပိုင်းမှာ အနိမ့်ဆုံး ကျဆင်းမှုဖြစ်ပါတယ်။
အခုလိုကျဆင်းခဲ့တာဟာ အဓိကအားဖြင့် သယ်ယူပို့ဆောင်ရေးနဲ့ စာတိုက် လုပ်ငန်းတွေ၊ အင်တာနက်နဲ့တယ်လီဖုန်း ဆက်သွယ်ရေး လုပ်ငန်းတွေမှာလည်း အဝယ်အမှာစာတွေ လျော့နည်းခဲ့တာကြောင့် ဖြစ်ပါတယ်။ အဲဒီနယ်ပယ်နှစ်ခုရဲ့အမှာစာတွေဟာ မတ်လမှာ မြင့်တက်ခဲ့ပြီးတဲ့နောက် ဧပြီလမှာ သိသိသာသာ ကျဆင်းခဲ့တာဖြစ်ပါတယ်။
စက်ပစ္စည်းတွေနဲ့ ပတ်သက်တဲ့ ခန့်မှန်းချက်ကို ၆လအတွင်း ပထမဆုံးအနေနဲ့ အခြေအနေအားနည်းနေတယ်လို့ အစိုးရအဖွဲ့ရုံးက လျှော့ချပြင်ဆင်ခဲ့ပါတယ်။
အဓိကအားဖြင့် ကိုရိုနာဗိုင်းရပ်စ်ဆိုင်ရာ ကပ်ရောဂါရဲ့ ဂယက်ရိုက်ခတ်မှုကြောင့် စီးပွားရေးလုပ်ငန်းတွေရဲ့ လှုပ်ရှားမှုတွေ အားပျော့တဲ့ အနေအထား ဖြစ်နေတာကို တွေ့ရတယ်လို့ အစိုးရအဖွဲ့ရုံးက ဆိုပါတယ်။

SOURCE – Nikkei