နိုင်ငံတွင်း ပြန်လည်ဝင်ရောက်ခွင့် ကန့်သတ်ချက်တွေ ဖြေလျှော့ပေးဖို့ ဂျပန် စီစဉ်

August 22, 2020 at 11:48 AM

ကိုရိုနာဗိုင်းရပ်စ် ကူးစက်ပြန့်ပွားမှု ထိန်းချုပ်ရေးအတွက် နိုင်ငံတွင်း ပြန်လည် ဝင်ရောက်ခွင့် တားမြစ်ချက်ကို ဖြေလျှော့ပေးဖို့ ဂျပန်အစိုးရက စီစဉ်နေတယ်လို့ သိရှိရပါတယ်။

လက်ရှိမှာ ဂျပန်အစိုးရက နိုင်ငံနဲ့ နယ်မြေပေါင်း ၁၄၆ ခုက နိုင်ငံခြားသားတွေကို ဝင်ရောက်ခွင့် ငြင်းဆိုထားပါတယ်။ အဲဒီကန့်သတ်ချက်တွေထဲမှာ အမြဲတမ်းနေထိုင်ခွင့်ရှိသူနဲ့ ကျောင်းသူ၊ ကျောင်းသားတွေလည်း အကျုံးဝင်ပါတယ်။ မီးဖွားခြင်းနဲ့ ဆွေမျိုးတွေရဲ့ ဈာပနအခမ်းအနားအတွက်တော့ ခြွင်းချက်ပေးထားပါတယ်။
ဒါပေမဲ့ လူမှုရေးနဲ့ စီးပွားရေးလှုပ်ရှားမှုတွေ ပြန်စရေး တွန်းအားပေးဖို့ တားမြစ်ချက်တွေ လျှော့ပေါ့ပေးရေး တောင်းဆိုမှုတွေ များပြားလာနေပါတယ်။
အဲဒါကြောင့် အစိုးရက PCR နဲ့ ဗိုင်းရပ်စ် စမ်းသပ်စစ်ဆေးမှုတွေနဲ့ သတ်မှတ်ထားတဲ့ ဟိုတယ်မှာ သီတင်း ၂ ပတ် ကိုယ့်ဘာသာ သီးသန့်ခွဲနေထိုင်တာမျိုး ပြုလုပ်စေပြီး ဒီအခြေအနေနဲ့ ကိုက်ညီတဲ့ နေထိုင်ခွင့်ရသူအားလုံးကို နိုင်ငံတွင်း ပြန်လည် ဝင်ရောက်ခွင့်ပြုဖို့ စီစဉ်နေပါတယ်။ အလားတူဆောင်ရွက်ချက်တွေကို လက်ရှိ ဂျပန်လူမျိုး ခရီးသွားတွေအတွက်လည်း ကျင့်သုံးနေတာ ဖြစ်ပါတယ်။
ဂျပန်နိုင်ငံမှာ နေထိုင်ခွင့်ရသူ နိုင်ငံခြားသား ၂.၆ သန်းလောက် ရှိပါတယ်။