ဂျပန်က ကျောင်းသူကျောင်းသားတွေအတွက် နွေရာသီကျောင်းပိတ်ရက် အချိန်တိုတောင်း

August 7, 2020 at 3:04 PM

ကိုရိုနာဗိုင်းရပ်စ် ကပ်ရောဂါကြောင့် နွေဦးရာသီမှာ ဖျက်သိမ်းခဲ့တဲ့ စာသင်ချိန်တွေကို အစားထိုးဖို့ ဂျပန်နိုင်ငံက ကျောင်းသူကျောင်းသားတွေအတွက် အခုနှစ် နွေရာသီအားလပ်ရက်တွေ အချိန်တိုတောင်းသွားပါတယ်။

ပုံမှန်အားဖြင့် သြဂုတ်လဟာ ကျောင်းပိတ်ရက်တွေ ဖြစ်ပေမဲ့ နိုင်ငံတစ်ဝန်းမှာရှိတဲ့ ပညာရေးဘုတ် အဖွဲ့ပေါင်း ၁,၇၀၀ ကျော်က ဆုံးရှုံးသွားတဲ့ စာသင်ချိန်တွေကို ပြန်ဖြည့်ဖို့အတွက် နွေရာသီအားလပ်ရက်တွေကို အချိန်တိုလိုက်ဖို့ စီစဉ်ထားတယ်လို့ ဂျပန်ပညာရေးဝန်ကြီးဌာနက ပြောပါတယ်။
မူလတန်းနဲ့ အလယ်တန်းကျောင်း တော်တော်များများဟာ အရင်က ပိတ်ရက် ၁၆ ရက် အစား ၉ ရက် ပဲ ပိတ်တော့မှာ ဖြစ်ပါတယ်။ တချို့ အထက်တန်းကျောင်းတွေကတော့ ၄ ရက်ပဲ ပိတ်မှာ ဖြစ်ပါတယ်။
ဆရာ၊ ဆရာမတွေနဲ့ ပညာရေးဆိုင်ရာ တာဝန်ရှိသူတွေက ရောဂါကူးစက်မှုနဲ့ အပူလျှပ်ဝေဒနာ နှစ်မျိုးစလုံးကို ကာကွယ်တားဆီးဖို့အတွက် လုပ်ငန်းစဉ်တွေ လုပ်ဆောင်နေပါတယ်။ တချို့ကျောင်းတွေက လေအေးပေးစက်တွေကို အသစ် တပ်ဆင်ထားပြီး၊ တချို့ကျောင်းတွေလည်း အတန်းချိန်တွေကို စောစော စတင်ဖို့ လုပ်နေပါတယ်။
တချို့ဧရိယာတွေမှာ ကျောင်းသွား ကျောင်းပြန်အတွင်း လမ်းမှာ နေထိုင်မကောင်းဖြစ်နေပုံရတဲ့ ကျောင်းသူကျောင်းသားတွေကိုတွေ့ရင် ကြည့်ရှုပေးဖို့ ရပ်ကွက်တွင်း နေထိုင်သူတွေကို မှာကြားထားပါတယ်။
တချို့ ဘတ်စကားကုမ္ပဏီတွေက ကလေးငယ်တွေရဲ့ ကျောင်းအသွား အပြန်အတွက် ကူညီဖို့ ယာယီဝန်ဆောင်မှုတွေ ပေးနေပါတယ်။

SOURCE – Asahi Shimbun