ဂျပန်နိုင်ငံရဲ့ အလုပ်လက်မဲ့နှုန်း ဧပြီလမှာ ၂.၆ ရာခိုင်နှုန်းအထိရှိလာ

May 29, 2020 at 8:13 PM

ကိုရိုနာဗိုင်းရပ်စ် ကပ်ရောဂါကြောင့် ဂျပန်နိုင်ငံရဲ့ အလုပ်လက်မဲ့နှုန်းဟာ ဧပြီလမှာ မြင့်တက်လာခဲ့ပါတယ်။ အလုပ်သမားပြတ်လပ်မှုကြောင့် နိုင်ငံတွင်းမှာ အလုပ်လက်မဲ့တွေ အတိုင်းအတာတစ်ခုထိ နည်းပါးနေသော်လည်း နောက်ဆုံး ရရှိထားတဲ့ အချက်အလက်အရ လုပ်ငန်းနယ်ပယ် အမျိုးမျိုးမှာ ဆိုးရွားတဲ့ အခြေအနေ ကို ရင်ဆိုင်နေရတယ်လို့ သိရပါတယ်။ ရာသီအလိုက် ညှိနှိုင်းထားတဲ့ အလုပ်လက်မဲ့နှုန်းဟာ ဧပြီလမှာ ၂.၆ ရာခိုင်နှုန်း ရှိခဲ့ပြီး မတ်လကထက် ဝ.၁ ရာခိုင်နှုန်း တိုးလာခဲ့တာ ဖြစ်တာကြောင့် ၂ လ ဆက်တိုက် အလုပ်လက်မဲ့နှုန်း တိုးလာခဲ့ပါတယ်။
အလုပ်လျှောက်သူတွေ အတွက် ကမ်းလှမ်းမှုတွေရဲ့ အချိုးအစားကလည်း ဧပြီလ အထိ ၄ လ ဆက်တိုက် ကျဆင်းနေပါတယ်။ ဒီအချိုးအစားဟာ ၁.၃၂ ရှိပြီး အလုပ်ရှာဖွေသူ အယောက် ၁၀၀ တိုင်းအတွက် အလုပ်အကိုင် ကမ်းလှမ်းမှု ၁၃၂ ခု ရှိတယ်ဆိုတဲ့ အဓိပ္ပာယ် ဖြစ်ပါတယ်။
လုပ်ငန်းနယ်ပယ် အမျိုးမျိုးမှာ အလုပ်ကမ်းလှမ်းမှုတွေ ကျဆင်းနေပြီး အထူးသဖြင့် ဟိုတယ်၊ စားသောက်ဆိုင်နဲ့ ကုန်ထုတ်လုပ်ရေး လုပ်ငန်းတွေ မှာ သိသာပါတယ်။ ပြီးခဲ့တဲ့နှစ်နဲ့ နှိုင်းယှဉ်ရင် ၃၀ ရာခိုင်နှုန်းကျော် ကျဆင်းခဲ့တာ ဖြစ်ပါတယ်။ဧပြီလက ချမှတ်ခဲ့တဲ့ အရေးပေါ်ကြေညာချက်ဟာ နယ်ပယ် အမျိုးမျိုးကို ကျယ်ကျယ်ပြန့်ပြန့် ဂယက်ရိုက်ခဲ့တယ်လို့ အစိုးရအရာရှိတွေက ပြောပါတယ်။
SOURCE – Kyodo News