Corona Virus ကူးစက်ပြန့်ပွားနေစဉ်အတွင်း လူများ လာရောက်လည်ပတ်မှုနှုန်း လျှော့ချရန် ခတ္တာပန်းပင် ရှစ်သိန်းခန့်ကို ဖျက်ဆီးခဲ့

April 20, 2020 at 2:13 PM

လက်ရှိ အချိန်အတွင်း ပုံမှန်အခြေအနေမျိုးတွင် တိုကျိုမြို့တော် အနီးရှိ Chiba စီရင်စုရှိ Sakura Furusato ရင်ပြင်တွင် Sakura Tulip Festa ပန်းပွဲတော်သို့ တက်ရောက်ရန် စုပြုံရောက်ရှိလာသော ကမ္ဘာလှည့် ခရီးသွားများနှင့် ပြည့်နှက်နေတတ်သည်။

ဂျပန်နိုင်ငံနှင့် နယ်သာလန်နိုင်ငံတို့အကြား နှစ်ပေါင်း ၄၀၀ ချစ်ကြည်ရင်းနှီးမှု အထိမ်းအမှတ်အဖြစ် တည်ဆောက်ခဲ့သည့် ဒတ်ချ် လေရဟတ်စက် အောက်တွင် စိုက်ပျိုးထားသော အရောင်မျိုးစုံနှင့် ခတ္တာပန်းများ ပွင့်သည့် အချိန်တွင် ပွဲတော်ကို နှစ်စဉ် ကျင်းပ လျက်ရှိသည်။
သို့သော် ယခုနှစ်တွင် တစ်နိုင်ငံလုံး အရေးပေါ်အခြေအနေ ကြေညာချက်ထုတ်ပြန်ထားခြင်းကြောင့် Corona Virus အမြန်ပြန့်ပွားနေမှုကို ရပ်တန့်ရန် Sakura Tulip Festa ပွဲတော်ကိုလည်း ၂၀၂၀ ခုနှစ်တွင် ဖျက်သိမ်းခဲ့သော်လည်း ပန်းများကို လာရောက်ကြည့်ရှုသော ဧည့်သည်ဝင်ရောက်မှုကို တားဆီးနိုင်ခြင်းမရှိသောကြောင့် ယခု လို ပန်းများကို ဖျက်ဆီးပစ်ရန် ဆုံးဖြတ်ခဲ့ကြသည်။

ဧပြီလ ၁၄ ရက် နှင့် ၁၅ ရက်နေ့တွင် မြို့တော် နှင့် မြို့တော်ခရီးသွားအသင်း တို့ ညှိုနှိုင်း တိုင်ပင်ခဲ့ပြီးနောက် ခတ္တာပန်းများကို ဖြတ်ပစ်ရန် ဆုံးဖြတ်ခဲ့ကြသည်။ ခတ္တာပန်းများအားလုံးကို ဖျက်ပစ်ရန် ဆုံးဖြတ်ချက်သည် ဝမ်းနည်းဖွယ်ကောင်းလှ သော်လည်း လူများအား လာရောက်လည်ပတ်ခြင်းကို တားဆီးရန် အတွက် ပြုလုပ်ခဲ့ခြင်းဖြစ်သည်။ အရောင်မျိုးစုံ ဖြင့် ပွင့်နေသော ခတ္တာပန်းများက လူအုပ်ကြီး ဆွဲဆောင်နေသောကြောင့် လက်ရှိ တိုင်းပြည်အတွင်း စိုးရိမ်ဖွယ်ကောင်းသော အခြေအနေတွင် မလွှဲမရှောင်သာ ဖျက်ဆီးရန် ဆုံးဖြတ်ခဲ့ကြရသည်။
ပြည်သူလူထု က အစိုးရ၏ ဆုံးဖြတ်ချက်ကို သဘောတူ ခဲ့ကြပြီး လူ့အသက်ကိုကယ်တင်ရန် စတေးခံခဲ့ရသည့် အပြစ်မရှိ ပန်းခင်းကြီးနှင့် ပန်းပင်များကို ဖျက်ဆီးရန် တာဝန်ယူခဲ့ကြသည့် လယ်သမားများအတွက် ဝမ်းနည်းကြောင်း ထုတ်ဖော်ပြောဆိုခဲ့ကြသည်။

SOURCE- soranews24