ဂျပန့် အကြီးတန်း ဥပဒေရေးရာ အရာရှိ လောင်းကစား သတင်းကြောင့် နုတ်ထွက်

May 21, 2020 at 7:29 PM

ကိုရိုနာဗိုင်းရပ်စ် ဆိုင်ရာ အရေးပေါ်အခြေအနေ ထုတ်ပြန်ထားတဲ့ကြားက ဂျပန်က ထိပ်တန်း ဥပဒေရေးရာ စုံစမ်းစစ်ဆေးရေးအရာရှိ တစ်ဦးဟာ လောင်းကြေးထပ် ကစားရတဲ့ မာဂျောင် ကစားခဲ့တယ်ဆိုတဲ့ သတင်းတွေ ထွက်ပေါ်လာခဲ့ပြီးနောက် ရာထူးက နုတ်ထွက်တော့မယ်လို့ သိရပါတယ်။
တိုကျို အထက်တန်း ဥပဒေဦးစီးအရာရှိရုံးရဲ့ စုံစမ်းစစ်ဆေးရေး အကြီးအကဲ Kurokawa Hiromu ဟာ မေလ ၁ရက်နေ့နဲ့ ၁၃ရက်နေ့တွေမှာ သတင်းစာဆရာ တစ်ယောက်ရဲ့ တိုကျိုက နေအိမ်မှာ မာဂျောင်ကို လောင်းကြေးနဲ့ ကစားခဲ့တယ်လို့ အပတ်စဉ်ထုတ် Shukan Bunshun မဂ္ဂဇင်းက ရေးသားခဲ့ပါတယ်။
စုံစမ်းစစ်ဆေးရေးအရာရှိတွေရဲ့ ပင်စင်ယူမယ့် အသက်ကန့်သတ်ချက်ကို တိုးမြှင့်မယ့် ဥပဒေမူကြမ်း အတည်ပြုရေး လွှတ်တော်အမတ်တွေက အချေအတင် ဆွေးနွေးနေကြတာမို့ အဆိုးဆုံး အချိန်နဲ့ကိုက်ပြီး ဒီသတင်းထွက်ပေါ်လာတယ်လို့ ဥပဒေဦးစီးအရာရှိရုံးက တချို့လူတွေက ပြောပါတယ်။၊
ဇန်နဝါရီလမှာ အစိုးရက မစ္စတာ Kurokawa ဟာ အရေးပါတဲ့ ပုဂ္ဂိုလ်တစ်ယောက် ဖြစ်တယ်လို့ ဆိုပြီး ဥပဒေရဲ့ သမားရိုးကျ အဓိပ္ပာယ်ဖွင့်ဆိုချက်ကို ပြောင်းလဲပြင်ဆင်ကာ သူ့ရဲ့ ပင်စင်ယူတဲ့ အချိန်ကို ဆိုင်းငံ့ခဲ့ပါတယ်။ အဲဒီလို စုံစမ်းစစ်ဆေးရေး ဥပဒေ အရာရှိတစ်ဦးရဲ့ ပင်စင်ယူမယ့်ကာလကို တိုးလိုက်တာ ပထမဦးဆုံးဖြစ်ပါတယ်။
ဝန်ကြီးချုပ် Abe ရဲ့ ရုံးနဲ့ ရင်းနှီးတဲ့ မစ္စတာ Kurokawa ကို အစိုးရက ဥပဒေဦးစီးအရာရှိချုပ် ခန့်ချင်တာကြောင့် ဒီလို လုပ်ဆောင်တာ ဖြစ်တယ်ဆိုပြီး အတိုက်အခံ ပါတီတွေက အပြစ်တင် ဝေဖန်နေပါတယ်။
အစိုးရအဖွဲ့က လိုအပ်တယ်လို့ ဆုံးဖြတ်မယ်ဆိုရင် အကြီးတန်း ဥပဒေ ဦးစီးအရာရှိ တစ်ဦးတစ်ယောက်ကို ပိုပြီး အချိန်ကြာကြာ ရာထူးခန့်ထား နိုင်ခွင့်ပြုတဲ့ ပြဋ္ဌာန်းချက်တစ်ခုကိုလည်း အစိုးရက ဖြည့်စွက်ထားပါတယ်။ ဒီ အချက်ကြောင့် မစ္စတာ Kurokawa ရဲ့ ပင်စင်ယူမယ့် အချိန်ကို တရားမဝင်၊ မဆီလျော်စွာ နောက်ဆုတ်ခဲ့တာကို မှန်ကန်ကြောင်းပြဖို့ အစိုးရက ကြိုးစားနေတယ်လို့ စွပ်စွဲနေတဲ့ ရှေ့နေအုပ်စုတွေဆီက ရှုတ်ချဝေဖန်မှုတွေ ထွက်ပေါ်လာခဲ့ရတာ ဖြစ်ပါတယ်။
Source – Japan Today

Tags: