Kumamoto ခရိုင်မှာ မိုးသည်းထန်ခဲ့ပြီး တစ်လအကြာ အနေအထား

August 4, 2020 at 6:30 PM

ဂျပန်အနောက်တောင်ပိုင်းက Kumamoto ခရိုင်မှာ စံချိန်တင်အောင် မိုးသည်းထန်ခဲ့တာကြောင့် အကြီးအကျယ် ဘေးသင့်မှု ဖြစ်ခဲ့တာ အင်္ဂါနေ့မှာ တစ်လ ပြည့်ပြီဖြစ်ပါတယ်။

ဒီခရိုင်မှာ အဲဒီနောက်ပိုင်းကတည်းက ကိုရိုနာဗိုင်းရပ်စ် ကူးစက်မှု အရေအတွက်ဟာ ၅ ဆနီးပါး မြင့်တက်လာခဲ့ပါတယ်။ ဘေးသင့်ဧရိယာတွေက လူတွေဟာ ကူးစက်မှု တားဆီးရေး လုပ်ငန်းစဉ်တွေကို လုပ်ဆောင်ရင်း ပြန်လည်တည်ဆောက်ရေးလုပ်ငန်းတွေကို လုပ်ကိုင်ရတယ်ဆိုတဲ့ ခက်ခဲတဲ့ အနေအထားကို ရင်ဆိုင်နေရပါတယ်။
ဇူလိုင်လ ၄ ရက်နေ့က မိုးသည်းထန်မှုကြောင့် ခူမ မြစ် ရေလျှံတာနဲ့ နေရာတချို့မှာ မြေပြိုတာတွေ ဖြစ်ခဲ့ရပါတယ်။ လူ ၆၅ ဦး သေဆုံးခဲ့ပြီး ၂ ဦး ပျောက်ဆုံးနေဆဲ ဖြစ်ပါတယ်။
တနင်္လာနေ့အထိ လူ ၁,၄၀၀ကျော် တိမ်းရှောင်ခိုလှုံရေးစခန်းတွေမှာ နေထိုင်နေကြပါတယ်။ ခရိုင်အုပ်ချုပ်ရေးအဖွဲ့ရဲ့ စစ်တမ်းတစ်ခုအရ လူ ၅၀၀ ကျော်ဟာ ကိုရိုနာဗိုင်းရပ်စ် ကူးစက်မှာကို စိုးရိမ်တာ အပါအဝင် အကြောင်းပြချက်တွေနဲ့ ခိုလှုံရေးစခန်းတွေကို ရှောင်ရှားပြီး ထိခိုက်ပျက်စီးနေတဲ့ နေအိမ်တွေမှာပဲ နေထိုင်နေကြတာ တွေ့ရှိရပါတယ်။
ဘေးသင့်ခဲ့သူ လူ ၁၀၀ ကျော်ကို ကောက်ယူခဲ့တဲ့ စစ်တမ်းတစ်ခုမှာ ၃၂ ရာခိုင်နှုန်းက ကိုရိုနာဗိုင်းရပ်စ် ကပ်ရောဂါဟာ သူတို့ရဲ့ ဘဝတွေပြန်လည်ထူထောင်ရေးမှာ ဂယက်ရိုက်ခဲ့တယ်လို့ ဖြေကြားခဲ့ပါတယ်။
စေတနာ့ဝန်ထမ်းတွေ မလုံလောက်တာနဲ့ ကူးစက်မှုတားဆီးရေး လုပ်ငန်းစဉ်တွေအောက်မှာ တိမ်းရှောင်ခိုလှုံရတဲ့ နေထိုင်ရေးဆိုင်ရာ အခက်အခဲတွေကို သူတို့က ထောက်ပြခဲ့ကြပါတယ်။

SOURCE – Japan Today