အရေးပေါ်အခြေအနေ တိုးချဲ့ခြင်းအပေါ် အလုပ်သမားများနဲ့ မိဘများ စိုးရိမ်ပူပန်

May 5, 2020 at 8:39 AM

အရေးပေါ်အခြေအနေ တိုးချဲ့ခြင်းအပေါ် အလုပ်သမားများနဲ့ မိဘများ စိုးရိမ်ပူပန်
မေလ ၄ ရက်နေ့မှာ နိုင်ငံတစ်ဝန်း အရေးပေါ်အခြေအနေကြေညာချက်ကို မေလကုန်တဲ့အထိ တစ်လနီးပါး သက်တမ်းတိုးချဲ့ဖို့ ဆုံးဖြတ်လိုက်ပြီ ဖြစ်ကြောင်း ဂျပန်ဝန်ကြီးချုပ် Shinzo Abeက ထုတ်ပြန် ခဲ့ပြီးနောက်မှာတော့ ရောဂါဖြစ်ပွားမှုကြောင့် စားသောက်ဆိုင်လုပ်ငန်းတွေ၊ ခရီးသွားလုပ်ငန်းနဲ့ အခြားလုပ်ငန်းတွေက အလုပ်သမားများနဲ့ မိဘများက နောက်ထပ် ဘဏ္ဍာရေးနဲ့ တစ်ခြားအထောက်အပံ့များကို အစိုးရကို တောင်းဆိုခဲ့ကြပါတယ်။
နိုင်ငံတဝန်း အရေးပေါ်ကြေညာချက်ကာလကို ဝန်ကြီးချုပ် Abe တိုးချဲ့ခဲ့ပြီး နောက်မှာ တော့ Hokkaido၊ Tokyo၊ Osaka၊ Kyoto၊ Fukuoka နဲ့ အခြား စီရင်စု ၈ ခုကို အစိုးရ က အနီးကပ်စောင့်ကြည့်လျက်ရှိပါတယ်။
“Corona Virus ရောဂါ ကို မြန်မြန်ဆန်ဆန် ထိန်းချုပ်နိုင်ဖို့အရေးကြီးတယ်ဆိုတာကို နားလည်ပါတယ်။ ဒါပေမဲ့ အခက်အခဲ ပေါင်းစုံနဲ့ ရင်ဆိုင်နေရပြီး စီးပွားရေး သိပ်အဆင်မပြေတာကြောင့် ဒီနွေရာသီထဲတော့ ဖြည်းဖြည်းချင်း အလုပ်ပြန်လုပ်ခွင့်ပြုစေချင်တယ် လို့ ဂျပန်နိုင်ငံတောင်ပိုင်းမှာရှိတဲ့ နာမည်ကြီး ခရီးသွားနေရာတစ်ခုဖြစ်သော အိုကီနာဝါကျွန်းရှိ ဟိုတယ်လုပ်ငန်းတစ်ခု ဖြစ်တဲ့ Kariyushi Group Holdings Co ပိုင်ရှင် Chokei Taira က ပြောပါတယ်။
Elementary School နဲ့ Junior high school များကို ကျောင်းသားအရေအတွက် အနည်းငယ်စီခွဲပြီး ဖွင့်လှစ်သွားဖို့ အစိုးရက ရည်ရွယ်ထားတယ်လို့သိရပါတယ်။ မိဘတွေနဲ့ ကျောင်းဆရာဆရာမတွေက ဒီလို အုပ်စု ငယ်လေးတွေ ခွဲပြီး သင်ကြားမဲ့အစီအစဉ်ကို သဘောတူပေမဲ့ ရောဂါကူးစက်မှာကို စိုးရိမ်နေဆဲဖြစ်တယ်။
SOURCE – Japan Today