ကပ်ရောဂါပြန့်ပွား နေစဉ်အတွင်း တရားမဝင် အချိန်ပိုင်းအလုပ် တွေ ရှိ

April 20, 2020 at 7:02 PM

ဂျပန်နိုင်ငံမှာ ကိုရိုနာဗိုင်းရပ်စ် ကပ်ရောဂါ ကူးစက်ပြန့်ပွားမှု ဖြစ်နေတဲ့ အတောအတွင်း တိုးပွားလာနေတဲ့ အလုပ်လက်မဲ့နဲ့ အလုပ်ပြုတ်နိုင်ဖွယ် ရှိသူတွေ ဟာ လူမှုကွန်ရက်တွေကနေ တရားမဝင် အလုပ် ကမ်းလှမ်းစာတွေကို လက်ခံ ရရှိနေပါတယ်။

ဧပြီလ ၆ရက်နေ့အထိ အကြမ်းဖျင်း ၂လအတွင်းမှာ လူပေါင်း ၁၄၇၃ ဦးဟာ အလုပ်မရှိတော့တာ ဒါမှမဟုတ် အလုပ်ပြုတ်နိုင်ဖွယ်ရှိတဲ့ အခြေအနေနဲ့ ရင်ဆိုင်နေရတယ်လို့ အလုပ်သမား ဝန်ကြီးဌာနက ပြောပါတယ်။ကုမ္ပဏီတွေရဲ့ အလုပ်လုပ်နိုင်စွမ်း ကျဆင်းလာတာ ဟာလည်း အကြောင်းပြချက် တစ်ခု ဖြစ်တယ်လို့ အဲဒီ ဝန်ကြီးဌာနက ထောက်ပြ ပြောဆိုခဲ့ပါတယ်။

အလုပ်လက်မဲ့ အများစုဟာ တွစ်တာ (Twitter) ဒါမှမဟုတ် တခြား လူမှုကွန်ရက်တွေကို အသုံးပြုပြီး အလုပ်ရှာ ခဲ့ကြပါတယ်။အလုပ်ရှာသူတွေထဲက တချို့ဟာ တယ်လီဖုန်း ဒါမှမဟုတ် တခြား နည်းလမ်းတွေနဲ့ ငွေ တွေကို လိမ်ညာ ယူတဲ့ အလုပ်တွေလိုမျိုး ရာဇဝတ်သားတွေက လူတွေဆီကနေ လိမ်လည်တဲ့ တရားမဝင်အလုပ်တွေအတွက် ကမ်းလှမ်းစာတွေ ရရှိ ခဲ့ပါတယ်။ကိုယ်ပိုင် စီးပွားရေး လုပ်ငန်းကို ပိတ်ဖို့ ဆုံးဖြတ်ခဲ့တဲ့ အသက် ၂၆နှစ်အရွယ် အမျိုးသားတစ်ဦးဟာ သူ အလုပ်ရှာဖို့ တွစ်တာကို သုံးခဲ့ပြီးတဲ့နောက် မကြာခင်မှာပဲ အလုပ် ကမ်းလှမ်းစာ ၁၀စောင်လောက် ရရှိခဲ့တယ်လို့ ပြောပါတယ်။

အဲဒီ ကမ်းလှမ်းစာတွေ အားလုံးဟာ တယ်လီဖုန်းသုံးပြီး ငွေလိမ်ညာတဲ့ အလုပ်တွေနဲ့ ဆက်နွယ်နေတဲ့ တရားမဝင် အလုပ်မျိုးတွေ ဖြစ်တယ်လို့ သူက ဆိုပါတယ်။အိမ်မှာနေဖို့ လိုအပ်ပေမယ့် အလုပ် အသည်းအသန်လိုနေသူတွေဟာ လူမှုကွန်ရက်က တစ်ဆင့် အလုပ်ရှာလေ့ ရှိတယ်လို့ ကျွမ်းကျင်သူ တစ်ဦးက ပြောပါတယ်။ ဒီလို ကိစ္စတွေကို သီးခြား စောင့်ကြည့်မှု မရှိတာကြောင့် အဲဒီလူတွေဟာ တရားမဝင် အလုပ်တွေရဲ့ သွေးဆောင် ဖြားယောင်းမှုကို ခံရနိုင်တယ်လို့ အဲဒီ ကျွမ်းကျင်ပညာရှင်က သတိပေးပါတယ်။

SOURCE – NHK