ထရိန်နင်ဗီဇာနဲ့ဂျပန်ကိုလာမယ်ဆိုရင်

December 1, 2020 at 1:24 PM

မိမိလုပ်ကိုင်ရမဲ့အလုပ်အမျိုးအစားအလိုက် ဘာတွေကိုဘယ်လိုလုပ်ကိုင်ရမယ်ဆိုတာကို စာတွေ့လေ့ကျင့်ခြင်း၊ မိမိလုပ်ကိုင်မယ့်အလုပ်အတွက်စနစ်တကျလေ့လာခဲ့ခြင်းနဲ့မြန်မာပြည်မှာရှိကတည်းကဂျပန်မှာလုပ်ရမယ့်အလုပ်ရဲ့စည်းကမ်းများကိုစနစ်တကျသိထားဖို့လိုအပ်ပါတယ်။မိမိကဂျပန်ရဲ့ဘယ်နေရာမှာလစာဘယ်လောက်၊ဘယ်နှနှစ်လုပ်ရမှာနဲ့ ဂျပန်ဘက်နဲ့မြန်မာအေဂျင့်ရဲ့ချုပ်ဆိုထားတဲ့စာချုပ်ပါစည်းကမ်းတွေကိုစနစ်တကျသေချာဖတ်ဖို့နဲ့ ဂျပန်ကိုမလာခင်အရေးကြီးဆုံးကဂျပန်စာကိုသေချာပြင်ဆင်လာဖို့လိုအပ်ပါတယ်။အခုနောက်ပိုင်းမှာထရိန်နင်ဗီဇာကိုစနစ်တကျအလုပ်လုပ်ထားခဲ့တဲ့သူတွေအနေနဲ့အသစ်ထွက်ရှိလာတဲ့တိုခုတဲဂိနိုဗီဇာကိုပါပြောင်းလဲလုပ်ကိုင်နိုင်တဲ့အတွက်စည်းကမ်းတကျလုပ်ကိုင်နိုင်ရင်အခွင့်အရေးများစွာရှိနိုင်ပါတယ်။

ဂျပန်စာအရည်အချင်းနဲ့လိုအပ်သောအရည်အချင်းများ
ဂျပန်စာကတော့JLPTကိုလည်းတတ်နိုင်သလောက်Levelမြင့်နိုင်သလောက်မြင့်အောင်နဲ့အခြားဂျပန်စာအရည်အချင်းလုပ်ငန်းသုံးစကားများကိုလည်းလေ့လာခဲ့ဖို့လိုအပ်ပါတယ်။ဂျပန်ရဲ့ယဉ်ကျေးမှုနဲ့အလေ့အကျင့်စရိုက်များကိုလည်းလေ့လာထားသင့်ပါတယ်။များသောအားဖြင့်ဂျပန်ကိုလာဖို့အတွက်စိတ်စောပြီးဂျပန်စကားကိုသေချာမလေ့လာခဲ့သူကများပါတယ်။တကယ်တမ်းဂျပန်ရောက်တဲ့အခါ၊လုပ်ငန်းခွင်ရောက်တဲ့အခါဂျပန်စကားနားမလည်ဘဲအလုပ်အကြောင်းရှင်းပြတဲ့အခါနားမလည်မှုများပြီးအလုပ်ဆက်လုပ်ချင်စိတ်မရှိမှုများနဲ့စိတ်ဖိစီးမှုများလာကာမိမိနိုင်ငံကိုပြန်ချင်စိတ်များလာပြီးရည်ရွယ်ချက်များပါပျောက်သွားနိုင်ပါတယ်။အဓိကဂျပန်စာအရည်အချင်းကိုအချိန်ရရင်ရသလောက်သေချာသင်ယူခဲ့ဖို့လိုအပ်ပါတယ်။ဂျပန်စာအရည်အချင်းN4,N5ကအခြေခံအဆင့်ဖြစ်တဲ့အတွက်ဂျပန်စကားကိုသေချာပြောနိုင်လောက်တဲ့အခြေအနေမဟုတ်တဲ့အတွက်အချိန်ရသလောက်လေ့လာခဲ့တာကပိုအဆင်ပြေပါမယ်။

ထရိန်နင်ဗီဇာရဲ့လိုက်နာရမယ့်စည်းကမ်းများ
မြန်မာပြည်ကနေဂျပန်ကိုမလာခင်စာချုပ်ချုပ်ဆိုမှုတွေပြုလုပ်ရပါတယ်။စာချုပ်အနေနဲ့၃/၅နှစ်အထိချုပ်ဆိုမှုပြုလုပ်သော်လည်းတကယ်တမ်းဂျပန်ရောက်တဲ့အခါတစ်နှစ်နေထိုင်ခွင့်ရရှိပြီးနောက်ထပ်သက်တမ်းကုန်ခါနီးတစ်နှစ်ပြီးတစ်နှစ်ထပ်တိုးသွားရတာဖြစ်ပါတယ်။ဂျပန်ရောက်လာတဲ့အခါမိမိလုပ်ကိုင်မယ့်အလုပ်နဲ့ပတ်သက်ပြီးတကယ်တတ်မြောက်မှုရှိမရှိကိုအရည်အချင်းစစ်စာမေးပွဲဖြေရပါတယ်။ဂျပန်စာအရည်အချင်းဘယ်လောက်ရှိလဲဆိုတာလည်းစစ်ဆေးခြင်းများပြုလုပ်ပါသေးတယ်။အလုပ်လုပ်ပြီး(၁၀)လကြာတဲ့အခါအတတ်သင်စစ်ဆေးစာမေးပွဲထပ်ဖြေဆိုရပါတယ်။ဆယ်လအလုပ်လုပ်ထားတဲ့အတွေ့အကြုံကိုထပ်ဖြေဆိုရပါတယ်။အဲလိုဖြေဆိုမှုအနေနဲ့ပထမတစ်ကြိမ်ကျရှုံမှုအနေနဲ့ထပ်ကြိုးစားရင်အဆင်ပြေနိုင်ပေမယ့်ဒုတိယအကြိမ်ကျရှုံးရင်မိမိနိုင်ငံကိုပြန်ရမှာဖြစ်ပါတယ်။ရေးဖြေနဲ့နှုတ်ဖြေဆိုပြီးပုံစံ(၂)မျိုးဖြေဆိုရမှာဖြစ်ပါတယ်။ရေးဖြေအနနဲ့စာမေးပွဲစောင့်များကဖတ်ပေးတဲ့ဂျပန်အသံထွက်ကိုနားထောင်ပြီးအမှားအမှန်ကိုရွေးချယ်ပေးရတာဖြစ်ပါတယ်။နှုတ်ဖြေအနေနဲ့ကအလုပ်လုပ်ထားတဲ့အတွေ့အကြုံကိုဂျပန်လိုမေးခွန်းမေးပြီးနားလည်၊မလည်တာကိုစစ်ဆေးခြင်းဖြစ်ပါတယ်။

အတွေ့အကြုံများနဲ့အကျိုးကျေးဇူးများ

ဂျပန်နိုင်ငံရဲ့အလုပ်အတွေ့အကြုံ၊နည်းပညာ၊ဂျပန်ဘာသာစကား၊ယဉ်ကျေးမှုနဲ့အခြားသောအတွ့အကြုံအကျိုးကျေးဇူးများရရှိလာပါမယ်။ဂျပန်စာအရည်အချင်းနဲ့အလုပ်အတွေ့အကြုံပေါ်မူတည်ပြီးဗီဇာသက်တမ်းထပ်တိုးလို့ရနိုင်ပါမည်။ဂျပန်မှာနေထိုင်တဲ့အချိန်မှာဂျပန်စာ၊စကားတော့တိုးတက်ဖို့လိုအပ်ပါတယ်။ဂျပန်မှာနေထိုင်ရင်းသေချာကြိုးစားပြီး၊စည်းကမ်းတကျနေမယ်ဆိုရင်ကျောင်းဗီဇာအထိပါပြောင်းလဲနိုင်မှာဖြစ်ပါတယ်။တကယ်ကျောင်းဗီဇာပြောင်းလဲခွင့်ရတဲ့သူတွေအနေနဲ့မြန်မာပြည်တစ်ခေါက်ပြန်ပြီးကျောင်းဗီဇာအတွက်လိုအပ်တာတွေပြင်ဆင်ရမှာဖြစ်ပါတယ်။ဒီနေရာမှာတစ်ခုပြောချင်တာကမြန်မာပြည်ကဂျပန်ကိုလာဖို့အလောတကြီးသွားချင်တဲ့သူတွေအတွက်မြန်မာပြည်မှာကသင်လာတဲ့ဂျပန်စာအရည်အချင်းနဲ့တကယ်ဂျပန်ရောက်လာတဲ့အခါဂျပန်လူမျိုးကိုပြောရတဲ့အခါကြုံတွေ့ရတဲ့ဂျပန်စကားနဲ့ကွဲပြားနိုင်တဲ့အတွက်အချိန်ရှိသမျှဂျပန်စာကိုလေ့လာဖို့လိုအပ်ပါတယ်။